NYHEITER

Frå gamalt gartneri til sansehage

I det følgjande kan du lese om oppstarten av bedrifta frå ein artikkel i Storfjordnytt 10.06.10. Du kan også lese meir på www.mereteszengarden.no

Der blomar ein gong fekk varme og gode vekstvilkår, skal menneske kunne slappe av og finne glede og ro i elvasusen ved Meretes Zen Garden.

Sissel Tiril Rem

tiril@storfjordnytt.no

Pakkhuset til det nedlagde gartneriet skin nymåla og grønt mot oss, medan vi tråklar oss nedover ein smal grusveg mot parkeringsplassen og ei rundkøyring med steinbed og blomar. Levande lys brenn både ute og inne. Gamle møblar pynta med puter og teppe står inne i huset som òg fungerer som kjøkken og stove i sommarhalvåret når Merete Myklebust bur i gartneriet.

Meditasjon

Onsdag 12. mai inviterte Merete for første gong til meditasjon i pakkhuset, i eit rom som snikkarane hadde lista så seint som same dagen. Tre valldalingar og fem strandarar har funne vegen til denne første meditasjonskvelden på Døvingen. Dei som klarer det, sit i lotusstilling. Merete forklarer kva

som skal skje, før alle presenterer seg og fortel kva erfaringar dei har frå liknande øvingar som yoga, pilates, avspenning og liknande. Avspenning står først på programmet med fokus på pusten.

– Særleg utpusten, innpusten går av seg sjølv, forklarer Merete. Etter kvart kjem rørsler inn. Snart står dei på føtene og strekkjer seg mot taket, snart dansar dei rundt til eggjande rytmar med opne eller  attlatne auga, alt etter kva som er best. Etterpå får Merete gode tilbakemeldingar både på variasjonen

i øvingar og måten ho leia den to og ein halv time lange meditasjonsstunda på.

– Somme sa at dei ikkje hadde vore så avslappa på lenge. Målet er å få ei god oppleving: slappe av, finne glede og ro.

Variasjonar

Slike kveldar er berre eitt av fleire tilbod som ho tilbyr fastbuande og ferierande. Andre tilbod er meditative vandreturar, workshops, handtering av overvekt og kurs i sjølvutvikling, stressmeistring og kunstmåling. Ho er òg i ferd med å gjere avtale med ein offentleg institusjon slik at unge kan få ein meiningsfull kvardag med sunne aktivitetar. ”Inn på tunet” og grøn omsorg er andre ho kan vere  vertskap til. Alt ho brukar her, er slikt som ho har lært i utdanninga ho tok i København. Ho er utdanna

psykoterapeut frå ID-Akademiet, men tok òg andre kurs undervegs. Det gjer ho framleis for å få påfyll og inspirasjon.

Zenhagen

Merete leitte lenge etter namn på staden og tilbodet. ”Garden” i namnet er det engelske ordet for ”hage”. I kortform seier ho zenhagen.

– Det fall på plass då eg fann ut at det som skal skje her, har ein slektskap med noko eg har hatt i

livet lenge. Eg fekk kjennskap til meditasjon for første gong for 20 år sidan som ein del av zensporten

karate som eg dreiv med i 13 år. Zen er ein fellesnemnar for meditasjon og ”mindfulness” – å vere til stades her og no – er ein stor del av livet mitt.

– Korleis skal du lokke dei som kjenner motstand mot slikt?

– Dei må berre spørje, så skal eg forklare. Mange har ein naturleg skepsis, men eg håper dei likevel vil prøve. Vi er opptekne av korleis kroppen ser ut, men vi gløymer å vere i kroppen og i kjenslene våre. Det handlar om å byggje stress. Å bli “jorda”: å vere til stades. Det er eit alternativ til stressreduserande aktivitetar. Mange knyter kan hende yoga og sjølvutvikling til hippietida og alternative miljø som dei ikkje identifiserer seg med. Det har endra seg.

– I København har til dømes Nokia tilbod om meditasjon på arbeidsplassen for å førebyggje sjukdom. Etter at eg starta med regelbunden meditasjon, er eg kvitt fysiske symptom både i ryggen og andre stader. Fysiske spenningar er ofte mentale spenningar.

Offentleg støtte

I mai vedtok næringsfondsstyret å gje 40.000 kroner til første fase av prosjektet. Ho har tidlegare fått hoppid.no-midlar, utviklingsstipend og konsulenthjelp frå Innovasjon Norge. I saksvurderinga skreiv

næringssjef Toralv Klokkehaug at søknaden frå Meretes Zen Garden må vere midt i blinken for næringsfondet sidan det er snakk om både ei nyskaping og ei kvinne som ynskjer å skape

ein arbeidsplass og puste liv i garden og gartneriet.

– Det gjer godt å få støtte, ikkje berre i kroner og øre. Eg har fått mange positive tilbakemeldingar.

– Har du møtt innbitne motstandarar av meditasjon?

– Ja! Eg!, seier ho og flirer. – Eg trengte det ikkje, meinte eg. Det var ein gradvis prosess. Eg gjekk frå å vere den største skeptikaren til å bli den største tilhengjaren. Alle må leite i livet for å finne kva som gjev glede. Somme reiser på fisketur. Andre driv med kunstmåling.

Steg for steg

Meditasjonsrommet er som sagt ferdig. Det neste som står for dør, er å gjere det gamle drivhuset og pakkhuset klart til bruk iallfall halvparten av året. Til hausten startar arbeidet med sansehagen i drivhusruinane.

– Det skal vere vill vegetasjon,men på ein spesiell måte. Sansehagen skal gje stille, ro og harmoni med vatn, stein, jord, blomar og grønt. Viss Inn på tunet-tilbodet får god respons, vil ho vinterisolere det nyaste pakkhuset for heilårleg aktivitet. Det nyaste drivhuset kan òg bli ein hage.

– Eg ynskjer å få gjort alt før jul, men det kjem an på søknaden som ligg hos Innovasjon Norge.

– Det er litt av ei investering?

– Vidareutviklinga er avhengig av finansieringa. Eg samlar anbod no for å få eit budsjett for fase I og II. Eg skal ha mykje eigeninnsats og håper på dugnadshjelp. Eg må ta den tida det treng.

– Kva ville du ha gjort om

du ikkje satsa på dette?

– Då hadde eg nok blitt i København. Men det er kjekt å kunne realisere ein draum og å utvikle noko eige, seier Merete Myklebust og viser til www.mereteszengarden.no.